O concelleiro de Educación, David Santomil, visitou o martes 29 os centros escolares CEIP de Barouta e CEIP Agro do Muíño para coñecer o estado en que se encontran as pistas deportivas. O Concello vai realizar unha actuación de reparación e mantemento das pistas polideportivas no marco do Plan de Mellora de patios escolares. A contía da execución é de 34.998,99 euros.
A obra consistirá no acondicionamento do terreo, na limpeza con auga a presión do pavimento, os revestimentos interiores e acabados, así como o pintado de liñas con pintura. Segundo David Santomil, os traballos responderán á necesidade de ter o pavimento dos pavillóns en boas condicións para a práctica deportiva escolar e extraescolar, pois en ambos pavillóns realízanse actividades das escolas deportivas municipais, entre as que destaca a patinaxe. As obras durarán dous meses.
