A Volta ao Cole co Comercio xuntou máis de 2.500 persoas

126

Todo un éxito da segunda edición da Volta ao Cole co Comercio, que este ano reuniu preto de 2.500 persoas entre o Milladoiro e Bertamiráns en actividades para as e os pequenos da casa. Esta iniciativa das concellarías de Promoción Económica e de Mocidade celebrouse durante catro xornadas e repartiu vales e premios para o regreso ás aulas entre as familias participantes.

Ana Belén Paz, concelleira de Promoción Económica, amosouse moi satisfeita co volume de participación acadado, que “mostra que a proposta segue funcionando entre a veciñanza do concello e da contorna” conseguindo que se acheguen a Ames persoas para “consumir na hostalaría e o comercio local”.

Pola súa banda, a concelleira de Mocidade, Carmen Porto, explicou que “é fundamental facer posible que a mocidade desfrute dunha volta ao cole divertida e entretida. Esta proposta fai posible xornadas de diversión para toda a familia”.

Tamén Jorge López, presidenta da Xuntanza de Empresarios de Ames -XEA- amosou a súa satisfacción polas cifras deste ano. “Estamos gratamente sorprendidos pola gran cantidade de xente que acudiu a este evento. Énchenos de ledicia que os cativos desexaban máis os vales de comercio local que os premios físicos”, explicou.

A zona verde da travesía do Porto, no Milladoiro, e o parque do Ameneiral, en Bertamiráns, foron os lugares onde se celebraron, durante a primeira quincena do mes de setembro, actividades para amenizar o regreso ás aulas e fomentar o comercio e a hostelería das localidades. As nenas e nenos que acudiron puideron gozar de inchables, xogos do mundo, obradoiros de maquillaxe e de tatuaxe. Para rapazas e rapaces entre 12 e 17 anos, houbo atraccións como un touro mecánico, unha varradora, DJs e unha Holi Party.

No tocante ao sorteo, repartíronse 200 premios por un valor superior aos 2.000 euros. Entre estes houbo produtos electrónicos e vales de compra, que achegaron tanto XEA (30 de 20 euros) como o Concello (40 de 10€).