O derradeiro pleno deste mandato da Deputación da Coruña serviu para a aprobación dos primeiros 47 millóns de euros do Plan Único POS+2023 por unanimidade. O plan cubrirá o financiamento de 200 obras por toda a provincia e outros 7 millóns para gasto social. En total, o POS+2023 terá un orzamento de 89 millóns de euros para 93 concellos.
Dentro do apartado de Vías e Obras, o pleno destina máis de 5 millóns de euros ás estradas. En Ames recóllese a construción da senda peonil na DP 0206 en Biduído por 133.896 €. En total, o POS+2023 contempla cinco investimentos no municipio. O total económico do plan será de 1.126.239,36. Destes, 157.314,02 pertencen ao POS+ Social.
O Plan Único é o maior plan de obras e servizos das catro deputacións galegas e un dos máis importantes de España, con achegas económicas aos municipios que, ao final do ano, representan entre 90 e 100 millóns de euros anuais, case a metade do orzamento da Deputación da Coruña. Ademáis, permite que sexan os municipios os que decidan o destino de fondos en función das súas necesidades: obras e investimentos, mantemento de servizos públicos esenciais, gasto corrente, redución da débeda ou mantemento de servizos e axudas sociais.
Con cargo a estes primeiros 47 millóns de euros aprobados, os concellos financiarán un total de 200 obras na provincia, que suman un investimento total de 21,5 millóns euros. Outros 18 millóns serán destinados polos concellos a financiar gastos correntes que melloran servizos públicos municipais como alumeado, limpeza viaria, recollida de lixo ou mantemento de zonas verdes e 7 millóns de euros a investimentos e actividades de carácter social.
