O pasado 1 de agosto comezou a desenvolverse o novo servizo de axuda no Fogar., que aumenta o número de horas e permite aos auxiliares completar as súas xornadas e organizarse por zonas para dese xeito diminuír os desprazamentos entre domicilios. Disporase de máis elementos de axuda para atender as persoas con problemas de mobilidade, como camas articuladas, grúas ou orugas salva escaleiras e inclúense servizos novos como fumigación, taxi e taxi adaptado, acompañamentos puntuais, excursións e saídas. A nova empresa adxudicataria comprométese asemade a establecer horas de formación para o persoal.
O novo servizo de Axuda no Fogar foi adxudicado á empresa SS Ulla Sar por un importe de 1.908.327,72€ e un período de 2 anos prorrogables 1+1.
A concelleira de Servizos Sociais, Luísa Feijoó manifesta que “para nós non é un servizo mais senón un dereito. A nosa intención é seguir ampliando e mellorando este servizo na medida do posible ao igual que as condición dos e das auxiliares , sector feminizado e precarizado , dignificando o seu traballo xa que son o motor do servizo e os nosos ollos nos domicilios”.
