Formoso anima a aproveitar “as oportunidades que se presentan no ámbito dixital”

209

O presidente da Deputación da Coruña, Valentín González Formoso, participou en Palexco na segunda xornada de ‘Mundos Digitales’, un evento internacional de animación, efectos visuais e novos media celebrado do 7 ao 9 deste mes na Coruña.

Formoso, acompañado do director de ‘Mundos Digitales’, Manuel Meijide, e o coruñés gañador do Goya á mellor curtametraxe de animación, Xosé Zapata, visitou a feira, onde destacou “o talento que hai no audiovisual galego” e salientou “as oportunidades que se presentan hoxe en día no ámbito dixital, tanto a nivel de videoxogos como de películas, no que España é xa unha potencia como podemos constatar neste congreso”.

O evento reúne a todas as persoas relevantes do sector da animación a nivel nacional e internacional e conta coa presenza de 4 gañadores de premios Óscar, como Leo Sánchez, gañador do Óscar á mellor curtametraxe animada, e ducias de galardoados nos Goya.

Máis de 1.200 persoas inscríbironse para participar neste congreso, no que un dos pratos fortes é a súa feira de emprego, que se consolida, segundo sinalan na organización, como a segunda máis importante de Europa. O obxectivo deste espazo é atopar un gran número de profesionais de diferentes perfís para as producións que se están levando a cabo.