O Concello anunciou hoxe a aprobación, por parte da Xunta de Goberno local, das obras de asfaltado nos interiores do Instrumento (entre Ortoño e Bugallido) e no norte de Lapido. Estas obras inclúense no Plan Ames Progresa 2021-2023. Adxudicadas á empresa Excavaciones Pose SL por 192.995 €, e as obras inclúen a reforma da vía de acceso ao Instrumento dende Lapido. Foron aprobadas na Xunta de Goberno do 22 de setembro.
No caso dos interiores do Instrumento e norte de Lapido, construiranse dous tramos de 320 e 190 metros respectivamente. O firme actal será demolido e proxectarase un novo pavimento de formigón no lugar. Colocarase por baixo unha canalización de PVC con sumidoiros para a drenaxe.
No resto da vía, un espazo de 680 metros entre os dous núcleos e mais a entrada dende a estrada de Lapido, cada marxe lateral medrará 50 centímetros. As fochancas serán reparadas e disporase unha capa de rodaxe. No treito intermedio entre Lapido e O Instrumento executaranse 3 treitos con cunetas de seguridade, de 60 metros de lonxitude nas zonas interiores das curvas. Instalarase sinalización e un novo sinal de stop.
Esta obra súmase a outros proxectos nas parroquias de Ortoño e de Bugallido dentro do mesmo plan, como as melloras en Tarrío, licitadas por case 65.000€, ou a senda peonil Lapido-Maguxe, por máis de 200.000.
“Seguimos avanzando co Plan Ames Progresa, desta vez actuando nos núcleos do Instrumento e Lapido, nos que continuamos mellorando as vías e as infraestruturas do rural, aumentando a súa vez a seguridade viaria”, sinalou o alcalde de Ames e concelleiro de Obras, Blas García.
