Venres de magosto en Ames

41

Co mes de novembro volven os magostos a Ames. Este venres, 11 de novembro, terá lugar o da praza de Manuel Murguía no Milladoiro e mais o do campo da festa do San Amaro de Barouta. En ambos os dous eventos haberá música, obradoiros, xogos populares e produtos típicos de outono como castañas asadas, chourizos e doces.

Dende o Concello salientan a importancia do magosto como unha das festas máis populares de Galicia coas tradicionais degustacións de castañas. Ademais, o Concello parabeniza ao tecido asociativo local polo labor social e cultura en Ames.

No caso do Milladoiro, na organización colaboran a Xuntanza de Empresarios de Ames (XEA), o Concello de Ames e mais a ANPA As Brañas. Dará comezo ás 18h e haberá DJ e combos musicais da Escola Municipal de Música de Ames (EMMA), así como servizo de cantina. Ademais, sortearanse premios como unha Nintendo switch.

Nas actividades do Magosto haberá música, obradoiros, xogos populares e produtos típicos de outono

Por outra banda, o alumnado de sexto curso de educación primaria do CEIP de Barouta tamén organiza unha festa do Magosto para este venres, 11 de novembro, co obxectivo de recadar fondos para a excursión de fin de curso. Empeza ás 17h e contarán con carpa por se chove. Será no campo da festa do San Amaro de Barouta, coa organización do CEIP de Barouta, a ANPA San Mauro e o Concello de Ames. Ademais, de comer castañas as persoas que asistan poderán participar en diferentes obradoiros e xogos populares, e haberá concerto do grupo As Maianas.