Ames quere contar cunha oficina permanente de documentación da Policía Nacional na que se renoven DNIs ou pasaportes, ademais de expedirse tarxetas de identidade para persoas estranxeiras. Este servizo é moi demandando pola veciñanza e dende o Concello solicitarán que sexa unha realidade. Así se anunciou tras a reunión do alcalde, Blas García, e mais o concelleiro de Administración Xeral, Víctor Fernández, con representantes do Sindicato Unificado de Policía (SUP). Por parte desta asociación estiveron presentes o secretario provincial, Juan Manuel Gómez, o vicesecretario de organización na Coruña, David Rodríguez, e Jesús Vasconcellos, o secretario de relacións institucionais.
Aínda que hoxe en día existe unha unidade móbil que dá servizo a unhas 200 persoas, este non resulta suficiente. É por iso que o Concello levará a cabo xestións ante o Ministerio do Interior para que se poña en marcha a mencionada oficina. O SUP, pola súa parte, reclamará o mesmo nos órganos da Xefatura Superior de Policía de Galicia e no Consello de Policía.