O alcalde de Ames, Blas García, e as concelleiras e concelleiro, Uxía García, Ana Paz e Víctor Fernández acudiron ao convite da xornada de portas abertas da Fundación Secretariado Gitano, unha sociedade intercultural que leva máis de 40 anos traballado pola promoción integral das persoas xitanas. Actualmente, o Concello cédelle un local á Asociación no Milladoiro, e estudará novas vías de colaboración para o ano que vén.
A xornada, celebrada baixo o lema “Ven, es mucho lo que nos une”, xuntou a 120 persoas. Foi unha oportunidade para que familias, empresas e a administración coñecesen o traballo de Secretariado Gitano a través dos seus programas de emprego, educación, vivenda, loita contra a discriminación e promoción social.
O alcalde de Ames, Blas García, puxo de manifesto a importante labor que realiza esta Fundación e abriu a porta a ampliar a implicación do Concello de Ames no futuro. “A erradicación da pobreza, a igualdade e que todo o mundo reciba formación para poder acceder ao mercado laboral son obxectivos comúns da fundación co Concello de Ames. Sempre nos imos atopar, asegurou.
Esta fundación realiza unha importante labor coa comunidade xitana en materia de formación e emprego, educación, igualdade e non discriminación e na loita contra a pobreza e a exclusión social. Son diversos os programas que esta fundación leva a cabo en Ames e Santiago: Con Acceder impulsa a formación e o emprego para acadar a inserción laboral, atenderon a 194 persoas, das cales 52 son do Milladoiro. Desas 52 persoas, 8 acadaron un emprego; mediante Promociona promoven o éxito escolar e continuidade nos estudos para transformar o futuro da xuventude xitana.
Foron 39 as persoas beneficiadas no curso escolar 21/22, 15 do Milladoiro, 26 familias, 13 do Milladoiro, e 13 os centros nos que se está presente, 4 no Milladoiro; mediante o programa CalÍ esta asociación loita contra a discriminación e impulsa a igualdade das mulleres xitanas. Das 42 persoas atendidas en itinerarios individualizados, 15 son do Milladoiro. No pasado ano 2022 atendeuse un caso de discriminación no Milladoiro; en canto á loita contra a pobreza foron 165 os participantes en diversos programas de inclusión social e deste total, 41 persoas son do Milladoiro.
