O sábado 9 de decembro celebrouse o acendido de luces que marca o inicio do Nadal amesán. No acto, que tivo lugar na praza do Concello, participou o combo da Escola Municipal de Música de Ames e os coros Voces de Maía e Elelas. Foron precisamente representantes dos coros quen acenderon as luces xunto co alcalde, Blas García, nun xesto que pretendeu recoñecer o seu esforzo e achegas á sociedade amesá. A iluminación funcionará ata o 6 de xaneiro, entre as seis da tarde e as dúas da mañá.
O acendido de luces estivo acompañado pola tradicional chocolatada, onde se repartiron máis de 6.000 churros e 700 litros de chocolate.
As luces de Ames
O municipio conta este ano con 140 elementos decorativos, que chegaron a todas as parroquias do rural. Salientan 100 arcos, unha árbore de 15,5 metros de altura na rúa Agro do Medio e unha bóla xigante na praza da Madalena. Tamén se colocaron un A tridimensional -pola inicial do concello- de dous metros e medio na praza do Concello de Bertamiráns e un 2024 luminoso de dous metros na praza da Maía. Como novidade, este ano colocáronse diferentes elementos decorativos, elaborados con material de refugallo, na entrada do parque empresarial do Milladoiro.
